साताको पहिलो कारोबार दिन नेप्से परिसूचक ३.८० प्रतिशत बढेर बन्द भएको छ। यस दिन नेप्से परिसूचक १०५.५५ अंक बढेर २८८५.५३ विन्दुमा पुगेको छ। त्यसैगरी, यस दिन सेन्सेटिभ इण्डेक्स १९.८१ अंक बढेको छ भने फ्लोट इण्डेक्स ७.२७ अंक र सेन्सेटिभ फ्लोट इण्डेक्स ६.५७ अंक बढेको छ।
नेप्सेसँगै यस दिन कारोबार रकममा पनि उल्लेख्य सुधार भएको छ। अघिल्लो कारोबार दिन अर्थात गत बिहीबार ३ अर्बको शेयर खरिदबिक्री भएको बजारमा यस दिन २३१ कम्पनीको ८१ हजार ७०६ पटकको कारोबारमा ६ अर्ब ३२ करोड ४२ लाख ७४ हजार रुपैयाँ बराबरको १ करोड २१ लाख ५५ हजार कित्ता शेयर खरिदबिक्री भएको छ। नेप्सेसँगै भोल्यूम पनि बढेकोले दोस्रो बजारका लगानीकर्ताहरु उत्साहित देखिएका छन्।
नेप्से बढेसँगै यस दिन ५ कम्पनीको शेयर सकारात्मक सर्किट लेभलमा कारोबार भएको छ। यस दिन विन नेपाल लघुवित्त, लिबर्टी इनर्जी, शिवश्री हाइड्रोपावर, नेपाल इन्फ्रास्ट्रक्चर बैंक र बुद्धभुमि नेपाल हाइड्रोपावरको शेयर सकारात्मक सर्किट लेभलमा कारोबार भएको छ। त्यसैगरी, यस दिन अरुण भ्याली हाइड्रोपावरको शेयरमूल्य ९ प्रतिशत बढेको छ भने हिमालयन उर्जा, प्रोग्रेशिभ फाइनान्स, हिमाल दोलखा हाइड्रोपावर र कर्णाली डेभलमेन्ट बैंकको शेयरमूल्य ८ प्रतिशतभन्दा बढी बढेको छ।
यस दिन कुल ११ कम्पनीको मात्र मूल्य घटेको छ। जसमध्ये अधिकांश ऋणपत्र र म्युचुअल फण्डहरु रहेका छन्।
कारोबार रकमका आधारमा यस दिन अपि पावर शीर्ष स्थानमा रहेको छ। सो कम्पनीको यस दिन २६ करोडभन्दा बढीको शेयर खरिदबिक्री भएको छ। त्यसैगरी, यस दिन नेपाल टेलिकम र एचआईडिसीएलको २३ करोडभन्दा बढीको शेयर कारोबार भएको छ भने अरुण भ्याली हाइड्रोपावरको करिब २२ करोडको शेयर किनबेच भएको छ।
आइतबार १३ वटै उपसमूहको परिसूचक बढेका छन्। जसमध्ये विकास बैंक उपसमूहको परिसूचक सर्वाधिक ६.५६ प्रतिशत बढेको छ। त्यसैगरी, यस दिन वित्त उपसमूहको परिसूचक ६.३४ प्रतिशत बढेको छ भने लगानी उपसमूहको ६.३६ प्रतिशत बढेको छ। त्यसैगरी, यस दिन जलविद्युत उपसमूहको परिसूचक साढे ५ प्रतिशतभन्दा बढी बढेको छ भने होटल तथा पर्यटन र व्यापार उपसमूहको परिसूचक साढे ४ प्रतिशतभन्दा बढी बढेको छ।
